Populo Napulitano

Stampa questo articolo

Traduzione in italiano 

‘a nnipennènza d’ ‘o

Populo Napulitano

‘A nnipennènza nun è ‘na cosa ‘e niente ca pass’ ‘e moda. (Passàt’ ‘o tièmpo, passàt’ ‘a festa.) ‘A nnipennènza ‘e nu pòpulo è ‘na cosa sacra, ll’appartèna e nisciùno nce ‘a po’  luvà, ànze, chiù dìtto nfàccia, è ‘na špettànza pe’ isso stesso e n’ òbbrico pe’ ll’àti.

Ma che d’è nu populo? Isso è nu nzièm’ ‘e gente ca pàrleno ‘a stessa lengua, tèneno ‘a stessa cultura, comm’ ‘e tradiziùne, ‘o vvestì, ‘a religione, e po’ tènene ‘a stessa storia e n’ attaccamiènto p’ ‘a stessa terra. Chèsto stà šcrìtto int’ ‘a parìcchi papielli, comme: ‘A  Carta d’ ‘e Naziùne Aunìte, ‘a Cummenziòne Intenaziunàle p’ ‘e špettànze civili  e pulìtice d’ ‘o 1966, ‘a Cummenziòne ‘e Helsinki d’ ‘o 1975, e dint’ ‘a tutte chisti se parla d’ ‘a ‘Špettànza ‘a l’autocostituziòne d’ ‘e populi’ e ca se pònno fissà liberamente quànno e còmme vònne loro che špècie ‘e guvèrno l’àdda cumannà; picciò  chèst’ ‘autocostituzione d’ ‘e populi stà â còpp’ ‘a legge d’ ‘e sìngule stati.

Pe’ nuje napulitàne ‘o popule nuòsto è viècchjo chiù ‘e Roma, ma ha dato ‘o mmègljo accumminciànne d’ ‘o Ducato ‘e Napule nfin’ ô Regno borbonico d’ ‘e Ddoje Sicilie e da ‘o 1861 ‘o Populo Napulitano è stato mìso ašpartàto (comme pure chillu Siciliano ) pe’ nventà ‘o populo taliàno.

Paricchi populi stànno addivintànne nnipennènte, comme  chilli d’ ‘a ex Russja o d’ ‘a ex Jugoslavja, addò, addirittura, ‘a Sluvenja nun s’è maje sentùta dint’ ‘a storia comme nu populo. ‘O Populo Napulitano hà sèmpe cumbattùto p’essere libbero, d’Abbruzzo â Calabbrja, d’ ‘a Puglja a Gaeta, e ‘o stato taliano nce hà luvàto ‘a libbertà ‘e campà comm’ ‘a nu populo. Pe’ bij’ ‘e ‘stu fatto, a ‘o Populo Napulitano lle spètta e tène l’òbbrico‘e cumbattere p’ ‘a nnipennènza sòja.

Antonio Iannaccone