‘A LIVELLA

‘A LIVELLA

Animazione a cura di Luky’s Arts

livella totò.jpg
Ogn’anno,il due novembre,c’é l’usanza
per i defunti andare al Cimitero.
Ognuno ll’adda fà chesta crianza;
ognuno adda tené chistu penziero.

Ogn’anno,puntualmente,in questo giorno,
di questa triste e mesta ricorrenza,
anch’io ci vado,e con dei fiori adorno
il loculo marmoreo ‘e zi’ Vicenza.

St’anno m’é capitato ‘n avventura…
dopo di aver compiuto il triste omaggio.
Madonna! si nce penzo e che paura!,
ma po’ facette un’anema e curaggio.

‘O fatto è chisto,statemi a sentire:
s’avvicinava ll’ora d”a chiusura:
io,tomo tomo,stavo per uscire
buttando un occhio a qualche sepoltura.

“Qui dorme in pace il nobile marchese
signore di Rovigo e di Belluno
ardimentoso eroe di mille imprese
morto l’11 maggio del’31”

‘O stemma cu ‘a curona ncoppa a tutto…
…sotto na croce fatta ‘e lampadine;
tre mazze ‘e rose cu na lista ‘e lutto:
cannele,cannelotte e sei lumine.

Proprio azzeccata ‘a tomba ‘e stu signore
nce stava ‘n ata tomba piccerella,
abbandunata,senza manco un fiore;
pe’ segno,sulamente na crucella.

E ncoppa ‘a croce appena se liggeva:
“Esposito Gennaro – netturbino”:
guardannola,ca pena me faceva
stu muorto senza manco nu lumino!

Questa è la vita! ncapo a me penzavo…
chi ha avuto tanto e chi nun have niente!
Stu povero maronna s’aspettava
ca pure all’atu munno era pezzente?

Mentre fantasticavo stu penziero,
s’era già fatta quase mezanotte,
e ije rimanette nchiuso priggiuniero,
muorto ‘e paura…nnanze ‘e cannelotte.

Tutto a nu tratto,che veco ‘a luntano?
Ddoje ombre avvicenarse ‘a parte mia…
Penzaje: stu fatto a me mme pare strano…
Stongo scetato…dormo,o è fantasia?

Ate che fantasia; era ‘o Marchese:
c”o tubbo,’a caramella e c”o pastrano;
chill’ato appriesso a isso un brutto arnese,
tutto fetente e cu na šcopa mmano.

E chillo certamente è don Gennaro…
‘o muorto puveriello…’o šcupatore.
Dinto ‘a stu fatto ije nu’nce veco chiaro:
so’ muorte e s’  arretirano a chest’ora?

Putevano sta ‘a me quase nu palmo,
quanne ‘o Marchese se fermaje ‘e botto,
s’avota e tomo tomo..calmo calmo,
dicette a don Gennaro:”Giovanotto!

Da Voi vorrei saper,vile carogna,
con quale ardire e come avete osato
di farvi seppellir,per mia vergogna,
accanto a me che sono blasonato!

La casta è casta e va sì rispettata,
ma voi perdeste il senso e la misura;
la vostra salma andava sì inumata;
ma seppellita nella spazzatura!

Ancora oltre sopportar non posso
la vostra vicinanza puzzolente,
fa d’uopo,quindi, che cerchiate un fosso
tra i vostri pari,tra la vostra gente”

“Signor Marchese,nun è colpa mia,
ije nun v’avesse fatto chistu tuorto;
mia moglie è stata a ffa’ sta fesseria,
ije che putevo fa’ si ero muorto?

Si fosse vivo ve farrija cuntento,
pigliasse ‘a casciulella cu ‘e quatt’osse
e proprio mo, obbì dinto’a stu mumento
me ne trasesse dinto a ‘n ata fossa”.

“E cosa aspetti,oh turpe malcreato,
che l’ira mia raggiunga l’eccedenza?
Se io non fossi stato un titolato
avrei già dato piglio alla violenza!”

“Famme vedé..-piglia sta violenza…
‘A verità,Marché,me so’ scucciato
‘e te sentì, e si perdo ‘a pacienza,
me šcordo ca so’ muorto e so’ mazzate!…

Ma chi te cride d’essere…nu ddio?
Ccà dinto,’o vvuò capì ca simmo eguale?…
…Muorto sì tu e muorto so’ pur’ije;
ognuno comme a n’ato é tal’e quale”.

“Lurido porco!…Come ti permetti
paragonarti a me ch’ebbi natali
illustri,nobilissimi e perfetti,
da fare invidia a Principi Reali?”.

“Tu qua’ Natale…Pasca e Ppifania!!!
T”o vvuo’ mettere ncapo dinto a cervella
ca staje malato ancora ‘e fantasia?…
‘A morte ‘o ssaje ched”e?…è una livella.

Nu rre,nu maggistrato,nu grand’ommo,
trasenno stu canciello ha fatte ‘o punto
c’ha perzo tutto,’a vita e pure ‘o nomme:
tu nu t’hè fatto ancora chistu cunto?

Picciò, stamme a ssenti, nun fà ‘o restivo,
suppuorteme vicino che te mporta?
Sti ppagliacciate ‘e ffanno sulo ‘e vive:
nuje simmo serie, appartenimmo â morte!”

livella.png
‘A LIVELLAultima modifica: 2010-11-01T19:20:00+01:00da tonyan1
Reposta per primo quest’articolo